Hér eru fréttir af deildinni okkar

Velkomin á heimasíðu Höfða


Skólaárið 2020-2021 eru 20 börn í Höfða fædd 2017 eða 2018. Stelpurnar eru 7 og strákarnir eru 13.


Kennarar í Höfða eru: Dagbjört Rós deildarstjóri, Kristín Halla, Jóna María, Arna Björk, Ásdís Helga og Hildur (stuðningur).


Dagskipulag Höfða

  • Deildin okkar opnar kl. 7:45, þá er rólegur leikur.
  • Um kl. 8:10 förum við í morgunmat og kl. 8:45 förum við í hópastarf. Á föstudögum kl. 9 er vinastund á Völlum (salurinn). Þá koma allir saman og syngja og eiga notalega stund saman.
  • Um kl. 9:30 er samverustund/ávaxtastund, þá erum við t.d. að syngja, lesa, fara í leiki, ríma, klappa taktinn í nöfnunum okkar, spjalla og fáum okkur ávexti. Einnig eru 4 þjónar valdir sem leggja á borðið fyrir hádegismat og þeir segja með tákn með tali, hvað er í matinn.
  • Um kl. 10:00 er útivera til kl.11:15.
  • Hádegismaturinn er kl.11:30 og förum við í hvíld í framhaldi af honum.
  • Kl.13.00 förum við í val eða útiveru ef veður leyfir, til kl. 14:15, en á föstudögum förum við út á þessum tíma. Þá tekur við samverustund, nónhressing, frjáls leikur og/eða útivera þar til við förum heim.
  • Leikskólinn lokar kl. 16:30. Þau börn sem eru til 16:30 fara inn í Skóga um kl. 16:10.


Við erum með flæðandi morgunmat og hressingu sem þýðir að við borðum við þrjú borð og börnin mega fara frá borðinu þegar þau eru búin að borða og fara þá í frjálsan leik. Ef það komast ekki allir að borðinu í upphafi máltíðar eru þau í frjálsum leik á meðan og fara svo að borða þegar sæti losnar við borðin.


Við förum í hópastarf 4 daga vikunnar og er börnunum skipt niður í 2 hópa. Á mánudögum förum við í hreyfingu og tónlist. Á þriðjudögum fara 2 hópar saman í frjálsan leik, og tveir hópar í Lubbastsund/málörvun. Á miðvikudögum förum við í Listakrók og á fimmtudögum förum við í Lubbastund/málörvun og könnunarleik.


Við förum í val kl. 13 og virkar það þannig að börnin velja sér svæði til að fara á, þar eru ákveðin viðfangsefni í boði. Þau geta skipt um viðfangsefni innan svæðis en ekki um svæði. Það komast ákveðin mörg börn á hvert svæði og þau skiptast á að velja fyrst. Þau geta valið sama svæðið 2x í röð, en mega alltaf velja útiveru. Svæðin sem um ræðir eru deildarnar Laut, Hlíð, Skógar og Þúfa ásamt útisvæði, Völlum og Flæðum. Ef við komumst ekki út, þá bætast við Grund og Stóru-Flatir í stað útisvæðis.


Lubbi finnur málbein er efni sem hugsað er til málörvunar og hljóðanáms fyrir börn á aldrinum 2-7 ára. Þar fer hljóðanám fram í þrívídd, þ.e. þau nota heyrnar - og sjónskyn, ásamt hreyfi - og snertiskyn til að læra hljóðin. Hver hópur fer einu sinni í viku í Lubbastund. Í hverri viku er valinn stafur vikunnar og vinnum við með stafinn og hljóð hans. Við syngjum lag og lesum sögu um stafinn sem verið er að vinna með hverju sinni, förum í leiki og margt fleira. Við eigum okkar Lubba og notum við hann í Lubbastund en hann vill líka læra hljóðin og er með sín málbein. Hann hjálpar börnunum og þau hjálpa honum að læra hljóðin. Í Lubbastund tökum við alltaf annars konar málörvun með, þar sem við erum að ríma, setja saman orð, klappa taktinn í orðum, vinna með eintölu og fleirtölu og margt fleira.


Við erum að vinna með Tákn með tali, hvert barn og starfsmenn eiga sín tákn. Við syngjum nokkur lög með táknum og þjónarnir segja hvað er í matinn með táknum og bjóða gjörið þið svo vel. Einnig þökkum við fyrir okkur með táknum. Lögð verða inn 4 tákn í mánuði sem eru þá tákn mánaðarins.


SMT

Í upphafi skólaárs eru SMT reglurnar kenndar börnunum, notaðar eru 2 vikur til kennslu og æfingu á hverri reglu. Við lesum félagsfærnisögur um reglurnar fyrir börnin og sýnum þeim hvernig við förum eftir þeim. Börnin fá hrós fyrir að fara eftir reglunum og fá stundum bros. Öll börn fá eitt bros á viku og stundum meira. Við gefum fleiri bros þegar við erum að byrja að kenna hverja reglu. Þegar þau eru búin að fylla "orminn", fá þau umbun sem þau velja sjálf. Þau koma með hugmyndir um hvað þau vilja gera og við ræðum um hvort þær eru framkvæmanlegar. Svo kjósa þau á milli tveggja hugmynda. Við stefnum á að hafa a.m.k. eina umbun fyrir áramót og 1-2 eftir áramót.

SMT reglurnar eru:

  • Að nota inniröddina
  • Að hafa hendur og fætur hjá sér
  • Að ganga inni
  • Að hlusta á þann sem talar
  • Að taka saman
  • Að fara vel með leikföngin


Dygðir

Unnið er með eina dygð fyrir jól og aðra eftir jól. Á haustönn 2020 vinnum við með dygðina þolinmæði. Við vinnum með dygðina í gegnum allt okkar starf, notum orðið þolinmæði og vinnum verkefni sem tengjast henni. Dygðabrúðan okkar heitir Solla og fer hún einu sinni í heimsókn til barnanna á hverri önn. Í pokanum með Sollu er bók og í hana er skrifað hvað barnið og Solla gerðu saman yfir daginn og reynt að tengja það við dygðina sem unnið er með hverju sinni. Á vorönn 2021 munum við læra um dygðina ábyrgð.


Við viljum minna á að merkja föt barnanna og hafa nóg af aukafötum í körfunum.




© 2016 - 2021 Karellen