Karellen

Hér eru fréttir af deildinni okkar

Velkomin á heimasíðu Höfða


Skólaárið 2023-2024 eru 18 börn í Höfða fædd 2019 og 2020. Stelpurnar eru 7 og strákarnir eru 11.

Kennarar í Höfða eru: Dagbjört Rós deildarstjóri, Arna Björk, Jóna María, Leana og Sigrún Andrea.

Dagskipulag Höfða

  • Deildin okkar opnar kl. 7:45, þá er rólegur leikur.
  • Um kl. 8:10 förum við í morgunmat og kl. 8:45 til 9:30 förum við í hópastarf. Á föstudögum er vinastund á Völlum (salurinn). Þá koma allir saman og syngja og eiga notalega stund saman.
  • Um kl. 9:40 er samverustund/ávaxtastund, þá erum við t.d. að syngja, lesa, fara í leiki, ríma, klappa taktinn í nöfnunum okkar, spjalla og fáum okkur ávexti.
  • Um kl. 10:00 förum við í útiveru.
  • Hádegismaturinn er kl.11:30 og förum við í hvíld í framhaldi af honum.
  • Kl.13.00 förum við í útiveru og förum við inn kl. 14:15. Þá tekur við samverustund, nónhressing, frjáls leikur og/eða útivera þar til við förum heim.
  • Leikskólinn lokar kl. 16:30. Þau börn sem eru til 16:30 fara inn á Velli um kl. 16:10.

Við erum með flæðandi morgunmat sem þýðir að við borðum við tvö borð og börnin mega fara frá borðinu þegar þau eru búin að borða og fara þá í frjálsan leik. Ef það komast ekki allir að borðinu í upphafi máltíðar eru þau í frjálsum leik á meðan og fara svo að borða þegar sæti losnar við borðin.

Við förum í hópastarf á milli 8:45 og 9:30 flesta daga vikunnar. Í hópastarfi er börnunum skipt niður í 3 hópa, Lundahóp, Krummahóp og Spóahóp. Í hópastarfi förum við í hreyfingu, Lubbi finnur málbein/málörvun, útiveru, myndlist, fínhreyfingar, frjálsan leik og margt fleira skemmtilegt.

Lubbi finnur málbein er efni sem hugsað er til málörvunar og hljóðanáms fyrir börn á aldrinum 2-7 ára. Þar fer hljóðanám fram í þrívídd, þ.e. þau nota heyrnar - og sjónskyn, ásamt hreyfi - og snertiskyn til að læra hljóðin. Hver hópur fer einu sinni í viku í Lubbastund. Í hverri viku er valinn stafur vikunnar og vinnum við með stafinn og hljóð hans. Við syngjum lag og lesum sögu um stafinn sem verið er að vinna með hverju sinni, förum í leiki og margt fleira. Við eigum okkar Lubbabangsa og notum við hann í Lubbastund en hann vill líka læra hljóðin og er með sín málbein. Í Lubbastund tökum við alltaf annars konar málörvun með, þar sem við erum að ríma, setja saman orð, klappa taktinn í orðum, vinna með eintölu og fleirtölu og margt fleira.

Við erum að vinna með Tákn með tali, hvert barn og starfsmenn eiga sín tákn. Við syngjum nokkur lög með táknum og þjónarnir segja hvað er í matinn með táknum og bjóða gjörið þið svo vel. Einnig þökkum við fyrir okkur með táknum.


Dygðir

Unnið er með eina dygð fyrir jól og aðra eftir jól. Á haustönn 2023 vinnum við með dygðina virðingu. Við vinnum með dygðina í gegnum allt okkar starf, notum orðið virðing og vinnum verkefni sem tengjast henni. Dygðabrúðan okkar heitir Solla og fer hún einu sinni í heimsókn til barnanna á hverju skólaári. Í pokanum með Sollu er bók og í hana er skrifað hvað barnið og Solla gerðu saman yfir daginn og reynt er að tengja það við dygðina sem unnið er með hverju sinni. Við lesum síðan bókina í samverustundum. Á vorönn 2024 munum við læra um dygðina hugrekki.

Við viljum minna á að merkja föt barnanna og hafa nóg af aukafötum í körfunum. Það auðveldar fyrir okkur að fötin lendi í réttu hólfi :)

© 2016 - 2024 Karellen